အကြောင်းအမျိုးမျိုးကြောင့် ရန်ကုန်ကို ပြောင်းရွှေ့နေထိုင်တာတွေ များလာတဲ့အတွက် ရန်ကုန်ရဲ့အိမ်ခြံမြေဈေး က အတက်ဘက်ကို ဦးတည်နေတယ်လို့ ရန်ကုန်တိုင်းဒေသကြီး အိမ်ခြံမြေဝန်ဆောင်မှုအသင်း ဥက္ကဋ္ဌ ဒေါ်မြတ်မိုမိုက ပြောပါတယ်။ ဒါ့အပြင် အိမ်ခြံမြေအငှားဈေးကွက်လည်း အားကောင်းနေတယ်လို့ ဆိုပါတယ်။
ရန်ကုန်မြို့တွင်း ၆ မြို့နယ်မှာ လူဦးရေထူထပ်လာပြီး မြေနည်းလာသလို တိုက်ခန်းတွေ များပြားလာတဲ့အတွက် မြေကိုနှစ်သက်သူတွေက မြေရှိရာမြို့သစ်မြို့နယ်တွေမှာ ဝယ်လိုအား များပြားလာတယ်လို့ ဒေါ်မြတ်မိုမိုက ပြောပါတယ်။
အိမ်ခြံမြေဈေးကွက် အားကောင်းနေတာကြောင့် အိမ်ခြံမြေအကျိုးဆောင်တွေရဲ့ အခန်းကဏ္ဍက အရေးပါလာတဲ့ အတွက် သင်တန်းတက်ပြီးတဲ့ အိမ်ခြံမြေအကျိုးဆောင်လုပ်ငန်း လုပ်ကိုင်သူတွေကို လုပ်ကိုင်ခွင့် အသိအမှတ်ပြု လက်မှတ်တွေ ထုတ်ပေးထားပြီး ခိုင်မာမှုရှိအောင် ဆောင်ရွက်ပေးထားတယ်လို့ သိရပါတယ်။
