ရန်ကုန်တိုင်းဒေသကြီးအတွင်းမှာရှိတဲ့ စက်မှုကဏ္ဍမှာ ရာနှုန်းပြည့်နိုင်ငံခြားရင်းနှီးမြှုပ်နှံမှုလုပ်ငန်း ၂ ခု ဝင်ရောက်ရင်းနှီးမြှုပ်နှံဖို့ ရန်ကုန်တိုင်းဒေသကြီးရင်းနှီးမြှုပ်နှံမှုကော်မတီက အတည်ပြုပေးခဲ့ပါတယ်။ပြီးခဲ့တဲ့ရက်ပိုင်းက ပြုလုပ်တဲ့ ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီရဲ့ (၃/၂ဝ၂၅) ကြိမ်မြောက် အစည်းအဝေးမှာ အဲဒီလုပ်ငန်းတွေကို ခွင့်ပြုပေးခဲ့တာပါ။
အဲဒီရင်းနှီးမြှုပ်နှံမှုလုပ်ငန်းတွေဟာ CMP စနစ် နဲ့ အဝတ်အထည်အမျိုးမျိုးချုပ်လုပ်တဲ့ လုပ်ငန်းတွေဖြစ်ပြီး မတည်ငွေရင်းပမာဏ အမေရိကန်ဒေါ်လာ (၃ ဒသမ ၃၆၉) သန်းနဲ့ ပြည်တွင်းမှာလုပ်သား (၂,၈၀၂)ယောက်အတွက် အလုပ်အကိုင်တွေ ဖန်တီးပေး နိုင်မှာဖြစ်တယ်လို့ သိရပါတယ်။ရန်ကုန်တိုင်းဒေသကြီးဟာ နိုင်ငံ့စီးပွားရေးမောင်းနှင်မှုအတွက် အရေးပါတဲ့ ဒေသတစ်ခုဖြစ်တဲ့ အပြင် ရင်းနှီးမြှုပ်နှံဖို့ အကောင်းဆုံးဒေသတွေထဲက တစ်ခုဖြစ်ပါတယ်။
ရင်းနှီးမြှုပ်နှံမှုလုပ်ငန်းတွေ စတင် ဆောင်ရွက်ရာမှာ သက်ဆိုင်ရာဝန်ကြီးဌာနတွေ တိုင်းဒေသကြီးနဲ့ ပြည်နယ်အစိုးရတွေရဲ့ ပံ့ပိုးကူညီမှုက အရေးကြီးတာကြောင့် ရင်းနှီးမြှုပ်နှံမှုတွေကို ဥပဒေနဲ့အညီ ကူညီပံ့ပိုးပေးဖို့ အသင့်ရှိတယ်လို့ ရင်းနှီး မြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာကံဇော်က ပြောကြားထားပါတယ်။အခုနှစ်အစောပိုင်းကလည်း ရန်ကုန်တိုင်းဒေသကြီးအတွင်းမှာရှိတဲ့ ဟိုတယ်နဲ့ခရီးသွားလုပ်ငန်းကဏ္ဍနဲ့ စက်မှုကဏ္ဍတွေမှာ ပြည်တွင်းပြည်ပရင်းနှီးမြှုပ်နှံမှုလုပ်ငန်းစုစုပေါင်း ၇ ခု ဝင်ရောက်ရင်းနှီးမြှုပ်နှံထား ပါတယ်။
