ရင်းနှီးမြှုပ်နှံမှုလုပ်ငန်းတွေ စတင်ဆောင်ရွက်ရာမှာ သက်ဆိုင်ရာဝန်ကြီးဌာနတွေ၊ တိုင်းဒေသကြီးနဲ့ ပြည်နယ်အစိုးရတွေရဲ့ ပံ့ပိုးကူညီမှုက အရေးကြီးတာကြောင့် ရင်းနှီးမြှုပ်နှံမှုတွေကို ဥပဒေနဲ့အညီ ကူညီ ပံ့ပိုးပေးဖို့ အသင့်ရှိတယ်လို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စု ဝန်ကြီး ဒေါက်တာကံဇော်က ပြောပါတယ်။
ပြီးခဲ့တဲ့ရက်ပိုင်းက ရန်ကုန်မြို့ Wyndham Grand Yangon Hotel မှာ ကျင်းပတဲ့ ရန်ကုန်ရင်းနှီးမြှုပ်နှံမှု ဖိုရမ် -၂၀၂၅ မှာ ပြည်ထောင်စုဝန်ကြီးဒေါက်တာကံဇော်က အခုလို ထည့်သွင်းပြောကြားခဲ့တာပါ။
ရန်ကုန်တိုင်းဒေသကြီးဟာ နိုင်ငံ့စီးပွားရေးမောင်းနှင်မှုအတွက် အရေးပါတဲ့ ဒေသတစ်ခုဖြစ်တဲ့အပြင် ရင်းနှီးမြှုပ်နှံဖို့ အကောင်းဆုံးဒေသတွေထဲမှာ တစ်ခုအပါအဝင်ဖြစ်တယ်လို့ ဆိုပါတယ်။ ဒါ့အပြင် MSME လုပ်ငန်းတွေအနေနဲ့ ရင်းနှီးမြှုပ်နှံမှုလုပ်ငန်းကြီးတွေနဲ့ ချိတ်ဆက်မှုရရှိပြီး ထုတ်လုပ်မှုကွင်းဆက်ကောင်း တွေ ဖြစ်ပေါ်လာဖို့ လိုအပ်တယ်လို့လည်း ပြောပါတယ်။
အဲဒီနောက် ရန်ကုန်တိုင်းဒေသကြီး စီးပွားရေးရာဝန်ကြီး ဦးမျိုးမြင့်အောင်ကလည်း ရန်ကုန်တိုင်းဒေသ ကြီးဟာ မြန်မာနိုင်ငံရဲ့ စီးပွားရေးနဲ့ ရင်းနှီးမြှုပ်နှံမှုကဏ္ဍမှာ အားကောင်းတဲ့ ဒေသတစ်ခုဖြစ်တာကြောင့် လျှပ်စစ်နဲ့ စွမ်းအင်လုပ်ငန်း၊ စိုက်ပျိုးရေး၊ စက်မှုနဲ့ ဝန်ဆောင်မှုလုပ်ငန်းတွေအပြင် MSMEs လုပ်ငန်းတွေ ကို ပိုမိုကောင်းမွန်လာစေဖို့ ပေါင်းစပ်ဆောင်ရွက်ဖို့ လိုအပ်တယ်လို့ ပြောကြားခဲ့ပါတယ်။
အဲဒီဖိုရမ်ကို ရန်ကုန်တိုင်းဒေသကြီးမှာ အလားအလာရှိတဲ့ ရင်းနှီးမြှုပ်နှံမှုအခွင့်အလမ်းတွေ ဖော်ထုတ် ပေးဖို့နဲ့ ပြည်တွင်းမှာရှိတဲ့ အငယ်စား၊ အသေးစား၊ အလတ်စား စီးပွားရေးလုပ်ငန်းတွေနဲ့ ရင်းနှီးမြှုပ်နှံမှု လုပ်ငန်းကြီးတွေအကြား ချိတ်ဆက်နိုင်ဖို့ ရည်ရွယ်ကျင်းပတာ ဖြစ်ပါတယ်။
ဖိုရမ်ကနေ ပြည်တွင်းပြည်ပ ရင်းနှီးမြှုပ်နှံသူတွေအကြား တိုက်ရိုက်စီးပွားရေးချိတ်ဆက်တာတွေ ပိုမို ရရှိခဲ့တယ်လို့လည်း ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနက ဖော်ပြထားပါတယ်။
