ပြည်တွင်းမှာ လိုအပ်တဲ့ ဘိလပ်မြေတွေကို ပြည်ပကနေ တင်သွင်းရာမှာ လာမယ့် ဖေဖော်ဝါရီလအတွင်း ရောက်ရှိ မှာ ဖြစ်တယ်လို့ ဘိလပ်မြေ တင်သွင်းမှုနဲ့ပတ်သက်ပြီး သတင်းထုတ်ပြန်ထားပါတယ်။
နိုင်ငံတစ်ဝန်းမှာ အခု ပွင့်လင်းရာသီချိန် ဆောက်လုပ်ရေးလုပ်ငန်းတွေ တိုးမြှင့်ဆောင်ရွက်နေရာ လုပ်ငန်းတွေ အချိန်မီ ပြီးစီးနိုင်ရေး အတွက် ဘိလပ်မြေလိုအပ်ချက်ကို ပြည်တွင်း ဘိလပ်မြေ စက်ရုံတွေရဲ့ ထုတ်လုပ်မှုတွေအပြင် ပြည်ပကနေ တင်သွင်းခွင့် ပြုထားတာလို့ ဆိုပါတယ်။ ဘိလပ်မြေကိုတော့ တရုတ်၊ ထိုင်း နဲ့ မလေးရှားနိုင်ငံတွေက အဓိက တင်သွင်းနေတာပါ။
ဆောက်လုပ်ရေးလုပ်ငန်းအတွက် မရှိမဖြစ် လိုအပ်တဲ့ ဘိလပ်မြေတွေကို အခု ဇန်နဝါရီ နောက်ဆုံးပတ်ကစပြီး ကော့သောင်းနယ်စပ် ကုန်သွယ်ရေးစခန်းနဲ့ ပင်လယ်ရေကြောင်းတွေကတစ်ဆင့် တင်သွင်းခွင့် ပြုနေတာဖြစ် ပါတယ်။
ပြီးခဲ့တဲ့ ရက်တွေကတော့ ပြည်တွင်းဈေးကွက်ထဲမှာ ဘိလပ်မြေတွေ ပြတ်လပ်မှု ဖြစ်ပေါ်ခဲ့ပြီး ဈေးနှုန်း တွေလည်း မြင့်တက်နေတယ်လို့ ဆောက်လုပ်ရေးလုပ်ငန်း လုပ်ကိုင်သူတွေနဲ့ အိမ်ဆောက်ပစ္စည်း ရောင်းဝယ်ရေး ဆိုင်တွေက ပြောကြားထားတာ ရှိပါတယ်။
လက်ရှိ ပြည်တွင်းမှာတော့ ဘိလပ်မြေစက်ရုံ ပုဂ္ဂလိကပိုင် ၁၆ ရုံ၊ နိုင်ငံပိုင် ၃ ရုံ စုစုပေါင်း ၁၉ ရုံ ရှိနေပြီး အပြည့်အဝ လည်ပတ်ဖို့ လိုအပ်နေသေးတယ်လို့ သိရပါတယ်။
