ပြည်ပကိုသွားရောက်လုပ်ကိုင်မှုတွေလုပ်နေဆောင်တာတွေကြောင့် ပြည်တွင်းမှာအလုပ်သမားရှားပါးမှုတွေဖြစ် နေတဲ့အတွက် ပြည်တွင်းမှာအလုပ်အကိုင်အခွင့်အလမ်းတွေဖော်ဆောင်ပေးဖို့ လိုအပ်တယ်လို့ နိုင်ငံတော် စီမံအုပ်ချုပ်ရေးကောင်စီဥက္ကဋ္ဌနိုင်ငံတော်ဝန်ကြီးချုပ်ဗိုလ်ချုပ်မှူးကြီးမင်းအောင်လှိုင်ကပြောပါတယ်။မတ်လ(၂၅)ရက် မနက်ပိုင်းက နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး အစည်းအဝေးခန်းမမှာ ပြုလုပ်တဲ့ နိုင်ငံတော်စီမံအုပ်ချုပ်ရေးကောင်စီအစည်းအဝေးမှာ အခုလို ထည့်သွင်းပြောကြားခဲ့တာပါ။
နိုင်ငံသားတွေအနေနဲ့လည်းပြည်ပကိုသွားရောက်လုပ်ကိုင်ခြင်းထက်ဘဝလုံခြုံမှုရှိတဲ့ပြည်တွင်းမှာလုပ်ကိုင်နိုင်မယ့်လုပ်ငန်းခွင်တွေမှာလုပ်ကိုင်မယ်ဆိုရင်လည်း ကြီးပွားတိုးတက်နိုင်မယ့်အခွင်အလမ်းတွေရှိပြီး ဖြစ်တဲ့အတွက် ပြည်ပကိုသွားရောက်လုပ်ကိုင်မယ့်အစားပြည်တွင်းမှာသာအလုပ်လုပ်ကြဖို့တိုက်တွန်းပြောကြားခဲ့ပါတယ်။ဒါ့အပြင် ပြည်တွင်းမှာလုပ်ကိုင်နိုင်ရေးအတွက်လည်း နည်းပညာတွေ၊ အလုပ်အကိုင်အခွင့်အလမ်းတွေ၊ စက်မှု နည်းပညာစတာတွေကို ဖော်ဆောင်ပေးနိုင်ရမယ်လို့လည်းပြောကြားခဲ့ပါတယ်။
