ပြည်ပအလုပ်အကိုင်အေဂျင်စီတွေအနေနဲ့ နိုင်ငံအလိုက် အလုပ်ခေါ်စာအသစ် တင်ရမယ့် လုပ်သားဦးရေကို ကန့် သတ်ခွင့်ပြုပေးနေတယ်လို့ အလုပ်သမားဝန်ကြီးဌာန ကနေ သိရပါတယ်။အလုပ်သမားဝန်ကြီးဌာနအနေနဲ့ မတ်လ ၂၂ ရက်ကစပြီး နိုင်ငံအလိုက် အလုပ်ခေါ်စာခွင့်ပြုတဲ့ အရေ အတွက်ကို စတင် ထုတ်ပြန်ခဲ့တာ ဖြစ်ပါတယ်။
မတ်လ ၂၂ ရက်က ထိုင်းနိုင်ငံအတွက် အလုပ်ခေါ်စာတင်ပြရမယ့် လူဦးရေ အယောက် ၅၀ ၊ မတ်လ ၂၃ ရက်မှာ ဂျပန်နိုင်ငံအတွက် အလုပ်ခေါ်စာ တင်ပြရမယ့် လူဦးရေ ၁၅ ယောက်၊ စင်ကာပူနိုင်ငံအတွက် အလုပ်ခေါ်စာ တင်ပြ ရမယ့် လူဦးရေ ငါးယောက် နဲ့ ကိုရီးယားသမ္မတနိုင်ငံကို အလုပ်ခေါ်စာတင်ပြရမယ့် လူဦးရေ ၁၀ ယောက်သာ အေဂျင်စီတစ်ခုအနေနဲ့ တစ်လကို တစ်ကြိမ် တင်ပြရမှာ ဖြစ်တယ်လို့ အလုပ်သမားဝန်ကြီးဌာနရဲ့ ထုတ်ပြန်ချက် တွေအရ သိရပါတယ်။ဇန်နဝါရီ ၃၀ ရက်မတိုင်မီ နိုင်ငံအလိုက် အလုပ်ခေါ်စာတင်ပြထားတာတွေကိုတော့ အခုသတ်မှတ်တဲ့ လူဦးရေ အတိုင်း မတ်လ ၂၅ ရက်ကစပြီး ပြင်ဆင်တင်ပြရမှာ ဖြစ်သလို အလုပ်ခေါ်စာအသစ်တွေ တင်ပြတာကိုတော့ လာမယ့် မေလ ၂ ရက်ကစပြီး လက်ခံဆောင်ရွက်ပေးသွားမယ်လို့ လည်း ထုတ်ပြန်ချက်တွေအရ သိရပါတယ်။
ပြည်ပအလုပ်အကိုင်အေဂျင်စီတွေအနေနဲ့ အလုပ်ခေါ်စာတွေကို အလုပ်သမားဝန်ကြီးဌာနကို လူကိုယ်တိုင် လာရောက်တင်ပြဖို့ မလိုဘဲ အလုပ်သမားညွှန်ကြားရေး ဦးစီးဌာနရဲ့ အီးမေးလ်တွေကတစ်ဆင့် ပေးပို့ တင်ပြ ရမယ်လို့လည်း ထုတ်ပြန်ချက်အရ သိရပါတယ်။နိုင်ငံအလိုက် မြန်မာလုပ်သားစေလွှတ်ရမယ့် လုပ်ငန်းစဉ်တွေအရ ခွင့်ပြုတဲ့ ကန့်သတ်လူဦးရေအရပဲ အလုပ်ခေါ်စာ တင်တာ နဲ့ စေလွှတ်ရမယ့် အခြေအနေမှာ ရှိနေတယ်လို့လည်း ပြည်ပအလုပ်အကိုင် အေဂျင်စီတွေက ပြောပါတယ်။
