ပြည်ပအလုပ်အကိုင်အေဂျင်စီတွေအနေနဲ့ထိုင်းနိုင်ငံကို အလုပ်ခေါ်စာအသစ်တင်ပြတာကို မေလ ၂ ရက်က စတင်ပြီး လက်ခံဆောင်ရွက်သွားမှာ ဖြစ်တယ်လို့ မတ်လ ၂၂ ရက်မှာ နိုင်ငံပိုင်သတင်းစာက တစ်ဆင့် ထုတ်ပြန် ထားပါတယ်။
ပြည်ပအလုပ်အကိုင် အေဂျင်စီတွေအနေနဲ့ အလုပ်သမားညွှန်ကြားရေး ဦးစီးဌာနကို တင်ပြရာမှာ အလုပ်ခေါ်စာ တင်ပြရာမှာ လူဦးရေ ၅၀ ထက် မပိုစေဖို့နဲ့ အေဂျင်စီတစ်ခုဟာ တစ်လကို တစ်ကြိမ်သာ တင်ပြရမှာ ဖြစ်တယ်လို့ ဆိုပါတယ်။ဇန်နဝါရီလ ၃၀ ရက်မတိုင်မီက စာချုပ်ချုပ်ဆိုထားတဲ့ မြန်မာအေဂျင်စီတွေအနေနဲ့ လူဦးရေ ၅၀ ထက်ပိုတဲ့ အလုပ် ခေါ်စာတွေကို မတ်လ ၂၅ ရက်နေ့ကစတင်ပြီး လူဦးရေ ၅၀ နဲ့ ပြန်လည်ပြင်ဆင် တင်ပြရမှာဖြစ်ပြီး တစ်လကို တစ်ကြိမ်သာ တင်ပြရမှာ ဖြစ်တယ်လို့လည်း သိရပါတယ်။
အလုပ်ခေါ်စာတွေ တင်ပြရာမှာ အလုပ်သမားဝန်ကြီးဌာနကို လူကိုယ်တိုင် လာရောက် တင်ပြတာ မပြုဘဲ အလုပ်သမား ညွှန်ကြားရေး ဦးစီးဌာနရဲ့ dolmigrationthaidemand@gmail.com ကို တင်ပြရမှာ ဖြစ်တယ်လို့ ဆိုပါတယ်။ဒါ့အပြင် ဂျပန်၊ ကိုရီးယား၊ စင်ကာပူ၊ မလေးရှားနဲ့ အခြားနိုင်ငံတွေအတွက် ဆောင်ရွက်ရမယ့် လုပ်ငန်းအစီအစဉ် တွေကိုလည်း မြန်မာ့အလင်းနဲ့ ကြေးမုံသတင်းစာတွေမှာ ဆက်လက်ဖော်ပြသွားမယ်လို့ သိရပါတယ်။
