တရားဝင်လိုင်စင်မရှိဘဲ နိုင်ငံခြားငွေကြေးတွေ ဝယ်ယူ၊ ရောင်းချ၊ လဲလှယ်တာကို ရည်ရွယ်ချက်ရှိရှိ ဆောင်ရွက် နေတဲ့ လူပုဂ္ဂိုလ်၊ အဖွဲ့အစည်းတွေကို ထိထိရောက်ရောက် အရေးယူနိုင်ရေး အရှိန်မြှင့် ဆောင်ရွက်သွားမယ်လို့ မြန်မာနိုင်ငံတော် ဗဟိုဘဏ်က ဇန်နဝါရီ ၁၄ ရက်မှာ ထုတ်ပြန်ပါတယ်။
ဗဟိုဘဏ်အနေနဲ့ တရားဥပဒေ စိုးမိုးရေးအဖွဲ့အစည်းတွေနဲ့ ပူးပေါင်းပြီး တရားမဝင် ဟွန်ဒီလုပ်ငန်းလုပ်ကိုင် ကြောင်း ကျော်စောသတင်းရှိသူတွေကို စစ်ဆေးမေးမြန်းတာအပြင် အဲဒီကျော်စောသူတွေရဲ့ ဘဏ်စာရင်းတွေနဲ့ ဘဏ်စနစ်ကို အသုံးပြုပြီး ငွေလွှဲပြောင်းတာတွေကို စိစစ်ပြီး အရေးယူနိုင်ရေးကိုလည်း ဆောင်ရွက်နေတယ်လို့ ဆိုပါတယ်။လက်ရှိကာလမှာ သံသယဖြစ်ဖွယ် တရားမဝင် နိုင်ငံခြားငွေ ဝယ်ယူ၊ ရောင်းချ၊ လဲလှယ်တဲ့ လူပုဂ္ဂိုလ် ၂၆ ယောက် နဲ့ ပတ်သက်ပြီး စိစစ်ဆောင်ရွက်ခဲ့ရာ မြန်မာနိုင်ငံရဲတပ်ဖွဲ့က လူပုဂ္ဂိုလ် ၉ ယောက်ကို အမှုဖွင့် အရေးယူထားပြီး ဖြစ်သလို နောက်ထပ် ၆ ယောက်ကို တည်ဆဲဥပဒေတွေနဲ့အညီ သက်ဆိုင်ရာ မြို့နယ်တရားရုံးတွေမှာ တရားစွဲဆို တင်ပို့ထားပြီး ဆက်လက် အရေးယူဆောင်ရွက်နေတယ်လို့ ထုတ်ပြန်ချက်မှာ ဖော်ပြထားပါတယ်။
အဲဒီအပြင် လူမှုကွန်ရက်စာမျက်နှာတွေကတစ်ဆင့် တရားမဝင်နိုင်ငံခြားငွေကြေးတွေ ဝယ်ယူ၊ ရောင်းချ၊ လဲလှယ် တာကို ဆောင်ရွက်နေတဲ့ Facebook Group (၁၂) ခု၊ Facebook Page (၅)ခုနဲ့ လူပုဂ္ဂိုလ် ၁၀ ယောက်တို့ကို လုပ် ထုံးလုပ်နည်းတွေနဲ့အညီ အရေးယူနိုင်ရေး စိစစ်ဖော်ထုတ်တာကိုလည်း ဆောင်ရွက်နေတယ်လို့ ထုတ်ပြန်ထားပါ တယ်။
