ကုန်ဈေးနှုန်းမြင့်တက်မှုတွေကြောင့် တရားစခန်းတွေမှာ ကျွေးမွေးလှူဒါန်းရေးကိစ္စရပ်တွေအတွက် အခက်အခဲ တွေ ရှိလာတယ်လို့ တရားရိပ်သာအချို့မှ ဆရာတော်တွေက မိန့်ပါတယ်။
အရင်နှစ်တွေထက် ကုန်ဈေးနှုန်းမြင့်တက်လာတာကြောင့် ကုန်ကျစရိတ်တွေ မြင့်တက်လာသလို တစ်ဖက်မှာ လည်း လာရောက်လှူဒါန်းတဲ့အလှူရှင်တွေ နည်းပါးလာလို့ အရင်နှစ်ထက်စာရင် အခက်အခဲတွေ ပိုရှိလာတယ်လို့ မိန့်ကြပါတယ်။
တရားစခန်းဖွင့်လှစ်ရာမှာ လတ်တလော ကြုံတွေ့နေရတဲ့အခြေအနေတွေနဲ့ပတ်သက်လို့ ရန်ကုန်တိုင်းဒေသကြီး၊ မှော်ဘီမြို့နယ်ရှိ အောင်မြေဗောဓိအလိုတော်ပြည့်ဓမ္မရိပ်သာကျောင်းတိုက်ဆရာတော် ပဋ္ဌာန်းရေကြည်/ရေဆူ ဆရာတော် ဘဒ္ဒန္တဝဏ္ဏိတက အခုလို မိန့်ပါတယ်။
အဲဒီ အောင်မြေဗောဓိအလိုတော်ပြည့်ဓမ္မရိပ်သာကျောင်းတိုက်မှာ နှစ်စဉ်တရားအားထုတ်ဖို့ လာရောက်သူတွေ အများအပြားရှိခဲ့ပြီး အခုနှစ်မှာလည်း အခက်အခဲတွေကြားထဲက တရားစခန်းကို ကြိုးစားဖွင့်လှစ်သွားမယ်လို့ မိန့် ပါတယ်။
ဖွင့်လှစ်ထားတဲ့ တချို့ရိပ်သာတွေမှာ တရားအားထုတ်ဖို့ရောက်ရှိခိုလှုံလာသူတွေ အရင်ထက် ပိုမိုများပြားလာပြီး ကြုံတွေ့နေရတဲ့ အခက်အခဲတွေနဲ့ပတ်သက်လို့လည်း သဘာဝတရားရိပ်သာဆရာတော် အရှင်ဥတ္တမသာရက အခုလို မိန့်ပါတယ်။
သဘာဝတရားရိပ်သာဆရာတော် အရှင်ဥတ္တမသာရအနေနဲ့ ပြည်တွင်း/ပြည်ပတရားရိပ်သာပေါင်း ရာနဲ့ချီဖွင့်လှစ် ထားပြီး တရားရိပ်သာ၊ ဘိုးဘွားရိပ်သာ၊ ကျန်းမာရေးစောင့်ရှောက်မှု၊ နေထိုင်ရေးနဲ့စားသောက်ရေး အခက်အခဲ ရှိတဲ့ မိသားစုဝင်တွေကို စောင့်ရှောက်ထားတာတွေအပါအဝင် ပရဟိတလုပ်ငန်းများစွာကို လုပ်ဆောင်နေသလို ပဋ္ဌာန်းရေကြည်/ရေဆူဆရာတော်ဘဒ္ဒန္တဝဏ္ဏိတကလည်း တရားရိပ်သာဖွင့်လှစ်တာနဲ့ ကိုဗစ်ကာလအတွင်း ကိုဗစ်စင်တာတွေမှာ ပဋ္ဌာန်းရေကြည်တော်ဘူးတွေ ထောင်နဲ့ချီ လှူဒါန်းခဲ့တာအပါအဝင် ပရဟိတလုပ်ငန်းတွေကို လုပ်ဆောင်နေတယ်လို့ သိရပါတယ်။
