မကွေးတိုင်းအတွင်းမှာ ပဲစင်းငုံဈေးဟာ ပေါ်ခါစကလောက် ဈေးမရရှိတော့ဘဲ စျေးအကျဘက်မှာ ရှိနေတယ်လို့ ကုန်သည်တွေဆီက သိရပါတယ်။ ပဲစင်းငုံကို ပြီးခဲ့တဲ့ ဒီဇင်ဘာလလယ်ကစပြီး အရောင်းအဝယ်လုပ်နေပေမယ့် ပေါ်ခစက တစ်တင်းကို ကျပ် ၁ သိန်း ၂ သောင်းကျော် စျေးရှိခဲ့ပြီး အခုကာလမှာတော့ တစ်တင်းကို ကျပ် ၉ သောင်း ၂ ထောင် ဝန်းကျင်သာ စျေးရှိတော့တာပါ။
ပဲစင်းငုံစျေးကျဆင်းနေတာဟာ အိန္ဒိယက ဝယ်ယူမှု နည်းနေတာကြောင့်အပြင် ပြည်တွင်း ဝယ်လိုအားထက် ကုန်ပစ္စည်းထွက်ရှိမှုက များနေတာကြောင့် ဖြစ်တယ်လို့ ကုန်သည်တွေက သုံးသပ်ပြောဆိုကြပါတယ်။
ပဲစင်းငုံစျေးဟာ အတက်အကျမြန်နေပြီး အိန္ဒိယဝယ်ယူမှုရှိမှသာ လာမယ့် မတ်လနဲ့ဧပြီလတွေမှာ စျေးမြင့် တက်လာနိုင်တယ်လို့ မကွေးကုန်စည်ဒိုင် ဒုတိယဥက္ကဋ္ဌ ဦးကျော်ထွန်းက ပြောပါတယ်။
ပြီးခဲ့တဲ့နှစ်က အိန္ဒိယဝယ်လက်ကြောင့် ပဲစင်းငုံတစ်တင်းကို ကျပ် ၁ သိန်း ၆ သောင်းခွဲထိ စျေးရှိခဲ့လို့ အခုနှစ်မှာ တိုင်းအတွင်း ပဲစင်းငုံစိုက်သူ ပိုများခဲ့တယ်လို့ ဆိုပါတယ်။ မကွေး ပဲစင်းငုံစျေးကွက်ဟာ ရန်ကုန်စျေးကွက် ပေါ်မူ တည်ပြီး အရောင်းအဝယ်လုပ်နေကြတာ ဖြစ်တယ်လို့ သိရပါတယ်။
