အခု ၂၀၂၅-၂၀၂၆ ဘဏ္ဍာနှစ်မှာ စုစုပေါင်းစိုက်ဧက ၅ သန်းကျော်အတွက် စိုက်ပျိုးစရိတ်ချေးငွေ ကျပ် ၆၈၈ ဒသမ ၁၁ ဘီလီယံကျော် ထုတ်ချေးဖို့ လျာထားတယ်လို့ စီမံကိန်းနှင့်ဘဏ္ဍာရေးဝန်ကြီးဌာနကနေ သိရပါတယ်။၂၀၂၅ ခုနှစ် မိုးရာသီစိုက်ပျိုးစရိတ်ချေးငွေ ကျပ် ၅၃၈ ဒသမ ၂၁ ဘီလီယံကျော်၊ ၂၀၂၅ ခုနှစ် ဆောင်းရာသီ စိုက်ပျိုး စရိတ်ချေးငွေ ကျပ်၁၄၀ဘီလီယံနီးပါး၊ ၂၀၂၆ ခုနှစ် မိုးကြိုရာသီစိုက်ပျိုးစရိတ်ချေးငွေ ကျပ် ၁၀ ဘီလီယံ ထုတ်ချေးဖို့ လျာထားတာဖြစ်တယ်လို့ ဆိုပါတယ်။
မြန်မာ့လယ်ယာ ဖွံ့ဖြိုးရေးဘဏ်အနေနဲ့ ၂၀၂၅ ခုနှစ် မိုးရာသီစိုက်ပျိုးစရိတ်ချေးငွေတွေကို မေလ၁၉ရက်ကစပြီး ထုတ်ချေး ပေးနေပြီဖြစ်တယ်လို့လည်း သိရပါတယ်။တောင်သူလယ်သမားတွေအနေနဲ့ အရင်ချေးငွေကို အတိုးရော အရင်းပါ အကျေပြန်ဆပ်ပြီးမှ ချေးငွေအသစ် ထုတ်ချေးခွင့် ရရှိမယ်လို့လည်း မြန်မာ့လယ်ယာဖွံ့ဖြိုးရေးဘဏ်က အသိပေးထားပါတယ်။ပြီးခဲ့တဲ့ ၂၀၂၄-၂၀၂၅ ဘဏ္ဍာနှစ်က စိုက်ဧက ၄ သန်းခွဲကျော်အတွက် စိုက်ပျိုးစရိတ်ချေးငွေ ကျပ် ၆၂၃ ဒသမ ၁၄ ဘီလီယံကျော် ထုတ်ချေးပေးခဲ့တယ်လို့ စီမံကိန်းနှင့် ဘဏ္ဍာရေးဝန်ကြီးဌာနကနေ သိရပါတယ်။
