စပါး၊ပဲ၊ပြောင်း စတဲ့ သီးနှံ(၁၀)မျိုးကို အခုစိုက်ဧကနဲ့ ပန်းတိုင်ရည်မှန်းချက် မပြည့်မီတာကြောင့် နိုင်ငံ့ဝင်ငွေ လျော့နည်းရရှိမှုအနေနဲ့ အမေရိကန်ဒေါ်လာ(၈)ဘီလီယံကျော်ရှိခဲ့ပြီး သီးထပ်စိုက်ပျိုးမှု မရှိတဲ့အတွက် ဆုံးရှုံးမှု တွေပါ ထည့်တွက်ရင် (၁၉)ဘီလီယံလောက် ရှိတယ်လို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီး ချုပ်ဗိုလ်ချုပ်မှူးကြီးမင်းအောင်လှိုင်က ပြောပါတယ်။
မတ်လ(၂၅)ရက် မနက်ပိုင်းက နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး အစည်းအဝေးခန်းမှာ ပြုလုပ်တဲ့ နိုင်ငံတော်စီမံအုပ်ချုပ်ရေးကောင်စီအစည်းအဝေးမှာ အခုလို ထည့်သွင်းပြောကြားခဲ့တာပါ။အိမ်နီးချင်းနိုင်ငံတွေရဲ့ဈေးကွက်လိုအပ်ချက်တွေအလိုက် စိုက်ပျိုးမွေးမြူရေးထုတ်ကုန်တွေ တင်ပို့နိုင်ရေးအတွက် လည်း ကြိုးပမ်းဆောင်ရွက်သွားရမှာဖြစ်ပါတယ်။
စိုက်ပျိုးရေးသီးနှံတွေရဲ့ အထွက်နှုန်း ပန်းတိုင်ရည်မှန်းချက်နဲ့ သီးထပ်စွမ်းအားတွေကလည်း ပြည့်မီတာ မရှိတဲ့အတွက် နိုင်ငံတော်အနေနဲ့ ဆုံးရှုံးနစ်နာမှုတွေ ဖြစ်ပေါ်နေပြီး ဝင်ငွေထိခိုက်မှုတွေရှိတယ်လို့ ဆိုပါတယ်။ ဒါ့ကြောင့် မိမိတို့အနေနဲ့ အလုပ်လုပ်ဖို့နဲ့ အလုပ်လုပ်နိုင်ရေးအတွက် ဖန်တီးပေးနိုင်ရမှာဖြစ်သလို ကောင်စီဝင်တွေအနေနဲ့လည်း မိမိတို့သက်ဆိုင်ရာ တိုင်းဒေသကြီးနဲ့ပြည်နယ်အလိုက် ကျယ်ကျယ်ပြန့်ပြန့် သိရှိနိုင်စေရေး ဆောင်ရွက်သွားကြဖို့ လိုအပ်တယ်လို့လည်း ပြောကြားခဲ့ပါတယ်။
