မကွေးတိုင်းဒေသကြီးအတွင်းမှာ ခရမ်းချဥ်သီး၊ ပန်းဂေါ်ဖီ၊ ဂေါ်ဖီထုပ်၊ ကြက်သွန်နီ၊ခါကြက်ဥ၊ မုန်ညင်း အစရှိတဲ့ ကုန်စိမ်းသီးနှံတွေဟာ ပေါ်ကာစလောက် ဈေးမရတော့ဘဲ စျေးတွေကျဆင်းကာ အရောင်းအဝယ်အေးနေတယ် လို့ ကုန်စိမ်းရောင်းချသူတွေကပြောပါတယ်။ဒေသတွင်းက ထွက်ရှိတဲ့ကုန်စိမ်းတွေကို မကွေးမြို့ပေါ်နဲ့တခြားမြို့တွေမှာ ရောင်းချကြတာဖြစ်ပြီး အခုရာသီဟာ ကုန်စိမ်းပေါများချိန် ဖြစ်တာကြောင့် စျေးကျဆင်းနေတာပါ။
မကွေးတိုင်းဒေသကြီး၊ ဧရာဝတီမြစ်အနောက်ဖက်ကမ်းရှိ မင်းဘူး၊ စကု၊ ဆင်ဖြူကျွန်း စတဲ့ ဒေသတွေက ကုန်စိမ်း တွေအထွက်များပြီး မတ်လလောက်အထိ ထွက်ရှိကြပါတယ်။ အခုနှစ် ကုန်စိမ်းစျေးဟာ ပြီးခဲ့တဲ့နှစ်ကထက် စျေးကျဆင်းနေပြီး ခရမ်းချဥ်သီးက စျေးကျ အမြန်ဆုံး ဖြစ်တယ်လို့ ဆိုပါတယ်။ ဒေသတွင်းက ကုန်စိမ်းတွေ မထွက်တော့ရင်တော့ ရှမ်းပြည်နယ်ဘက်က ကုန်စိမ်းတွေကို မှာယူရောင်းချကြရတယ်လို့ သိရပါတယ်။
