ရခိုင်ဘက် လမ်းကြောင်းတွေ ပိတ်နေတဲ့အတွက် CP ကြက်တွေ မတင်ပို့ရတာကြောင့် မကွေးမြို့နယ်က CP ကြက် မွေးမြူရေးလုပ်ကိုင်သူတွေ အခက်ကြုံနေတယ်လို့ သိရပါတယ်။CP ကြက်မွေးမြူရေးလုပ်ကိုင်သူတွေဟာ ကြက်တစ်သုတ်ကို အများဆုံး ၄၅ ရက်၊ ရက် ၅၀ ဝန်းကျင်သာ ထားရှိပြီး တင်ပို့ရောင်းချကြပေမယ့် အခုကာလမှာတော့ လမ်းကြောင်း ပိတ်ဆို့တာတွေကြောင့် ကြက်ခြံတွေမှာ ကြက်တွေ ကို မွေးမြူထားရဆဲ ဖြစ်ပါတယ်။
ရက် ၇၀ ကျော် ရှိနေပြီဖြစ်တဲ့အတွက် ကြက်တွေဟာ အလေးချိန်တိုးတာ မရှိတော့ဘဲ ကြက်စာကျွေးနေရတော့ အပိုကုန်ပြီး အမြတ်အစွန်း နည်းတယ်လို့ မကွေးမြို့နယ် ကံသာလေးကျေးရွာမှ CP ကြက်မွေးမြူရေးလုပ်ကိုင်သူ ဦးပန်းဆိုင်က ပြောပါတယ်။ အခုလို ရက် ၇၀ ကျော်ထိ ကြက်တွေကို မွေးမြူထားရတာဟာ အခုနှစ်မှာ ပထမဆုံးအကြိမ် ဖြစ်တယ်လို့ ဆိုပါ တယ်။
မကွေးမြို့နယ်မှာ CP ကြက်မွေးမြူရေးကို ကုမ္ပဏီနဲ့ ချိတ်ဆက်လုပ်ကိုင်ကြတာဖြစ်ပြီး တစ်ပိုင်တစ်နိုင် စီးပွားဖြစ် မွေးမြူတာတွေလည်း ရှိပါတယ်။ ကုမ္ပဏီနဲ့ချိတ်ဆက်မွေးမြူရာမှာ ကြက်ခြံငှားခ၊ အလုပ်သမားခ စတဲ့ ဝင်ငွေတွေရရှိကြပြီး ကြက်တစ်သုတ်ကို ၄၅ ရက်ဝန်းကျင် မွေးမြူရကာ တစ်နှစ်ကို ၅ သုတ်လောက် မွေးမြူရ တယ်လို့ သိရပါတယ်။
