မကွေးကြက်သွန်စျေးကွက်တွင် ရွှေဝါမျိုး ဈေးကောင်းရနေ

မကွေးတိုင်းဒေသကြီးမှာတော့ ကြက်သွန်နီ ပေါ်ချိန်ဖြစ်တာကြောင့် ရွှေဝါမျိုးက ဈေးကောင်းရနေတယ်လို့ ကြက် သွန်ရောင်းဝယ်ရေး လုပ်ကိုင်သူတွေဆီက သိရပါတယ်။ ကြက်သွန်စိုက်ပျိုးကြသူတွေအနေနဲ့ ရွှေနီမျိုးနဲ့ ရွှေဝါမျိုး ဆိုပြီး ၂ မျိုးခွဲ စိုက်ကြရာမှာ အခုနှစ် စျေးကွက်ထဲမှာတော့ ရွှေဝါမျိုးက ဈေးကောင်းရနေတာလို့ ဆိုပါတယ်။

ရွှေနီမျိုးထက် အလုံးလှပြီး အရည်အသွေးလည်းကောင်းတဲ့အတွက် တစ်ပိဿာကို တစ်ထောင်ကျော်လောက် ဈေးကွာပါတယ်။ လက်ရှိ ကြက်သွန်ပေါ်ချိန်မှာ အနိမ့်ဆုံး စျေးတစ်ပိဿာကို နှစ်ထောင်ကျပ် ဝန်းကျင်ကနေ အမြင့်ဆုံးစျေး ၂၅၀၀ ကျပ် ဝန်းကျင်စျေးရှိပြီး ရွှေဝါမျိုးက စျေးကောင်းသလို အရောင်းအဝယ်ကောင်းတယ်လို့ ကြက်သွန် ရောင်းဝယ်ရေး လုပ်ကိုင်သူ ဦးမြင့်အောင်က ပြောပါတယ်။

မကွေးတိုင်းအတွင်းက ကြက်သွန်စိုက် တောင်သူတွေဟာ အထွက်နှုန်းကောင်းတဲ့ ရွှေနီမျိုးကိုသာ အများဆုံး စိုက်ပျိုးကြပြီး မကွေး ၊မင်းဘူး ၊ရေနံချောင်း ၊ဆိပ်ဖြူ၊ တောင်တွင်း စတဲ့ နေရာတွေမှာ အဓိက စိုက်ပျိုးကြတာ ဖြစ်ပါတယ်။