တရုတ်ဝယ်လိုအားရှိနေတာကြောင့် စမုံနှမ်းနက်ဝယ်ယူသိုလှောင်ထားသူတွေ ဈေးကောင်းရရှိနေတယ်လို့ မကွေးမြို့ကုန်စည်ဒိုင် ဒုတိယဥက္ကဋ္ဌ ဦးကျော်ထွန်းက ပြောပါတယ်။
မကွေးနှမ်းဈေးကွက်မှာ ပြီးခဲ့တဲ့နှစ် အခုလိုအချိန်မှာ စမုံနှမ်းနက်တစ်တင်းကို ကျပ်တစ်သိန်းရှစ်သောင်း ဝန်းကျင်သာရှိခဲ့ပေမယ့် အခုနှစ်မှာတော့ တရုတ်ဝယ်လိုအားကြောင့် တစ်တင်းကို ကျပ်နှစ်သိန်းသုံးသောင်းကျော်အထိ ဈေးကောင်းရနေတယ်လို့ ဦးကျော်ထွန်းက ပြောပါတယ်။နှမ်းအဖြူထိပ်စတစ်တင်းကတော့ တစ်သိန်းနှစ်သောင်းငါးထောင်ဈေးပဲရှိတယ်လို့လည်း ဆိုပါတယ်။မကွေးမြို့ကကုန်သည်ပွဲစားတွေအနေနဲ့ နှမ်းကို မန္တလေးဈေးကွက်ကို အဓိကတင်ပို့ကြတာဖြစ်ပြီး မန္တလေးကမှတစ်ဆင့် တရုတ်နိုင်ငံကို တင်ပို့ကြတာပါ။
မကွေးတိုင်းဒေသကြီးမှာ နှမ်းကို မိုးဦးကာလ၊ မိုးနှောင်းကာလ၊ ရေသွင်းနှမ်း စသဖြင့် သုံးရာသီလုံးစိုက်ပျိုးကြပြီး မိုးဦးရာသီကနှမ်းထွက်ရှိမှုအများဆုံးဖြစ်ပါတယ်။တရုတ်ဝယ်လိုအားကောင်းနေတာကြောင့် စမုံနှမ်းနက်တစ်တင်းကို ကျပ်နှစ်သိန်းခွဲအထိ ဈေးမြင့်တက်လာနိုင်တယ်လို့လည်း နှမ်းကုန်သည်တွေက ခန့်မှန်းထားကြတယ်လို့ သိရပါတယ်။
