မကွေးတိုင်းဒေသကြီး၊ သရက်မြို့၊ ရေလယ်ကျွန်းကျေးရွာမှာ အဓိက စိုက်ပျိုးတဲ့ ဆောင်းပြောင်းဖူးတွေဟာ အခုနှစ်မှာ အထွက်နှုန်းကောင်းပြီး စျေးကောင်းရနေတယ်လို့ တောင်သူတွေဆီက သိရပါတယ်။
ရေလယ်ကျွန်းကျေးရွာက တောင်သူအများစုဟာ ဆောင်းပြောင်းဖူးတွေ အများဆုံး စိုက်ပျိုးကြပြီး ပြောင်းဖူးမျိုးစေ့ တစ်ဗူးကျမှာ ပြောင်းဖူးတစ်ထောင်ကျော် ထွက်ရှိတယ်လို့ ဆိုပါတယ်။
အရင်နှစ်တွေက ဆောင်းပြောင်းဖူး တစ်ဖူးကို အခင်းပြတ် ၁၅၀ ကျပ်စျေးရှိကာ အခုနှစ်မှာ ပြောင်းဖူး တစ်ဖူး ၄၀၀ ကျပ် ကနေ ၅၀၀ ကျပ်စျေး ရှိနေပါတယ်။ ဆောင်းပြောင်းဖူးတွေကို ရန်ကုန်စျေးကွက်ကို အများဆုံး တင်ပို့ကြပြီး ပြောင်းဖူးတစ်ဖူးကို ၇၀၀ ကျပ်ကနေ ၁၀၀၀ ကျပ်ထိ စျေးရနေတယ်လို့ ပြောင်းဖူးစိုက်တောင်သူတွေက ပြောပါတယ်။
