ကုန်ဈေးနှုန်းများ ဆက်လက်မြင့်တက်နေ

လက်ရှိမှာ ဒေါ်လာဈေးတွေ၊ စက်သုံးဆီဈေးတွေ ကျဆင်းလာပေမယ့် ကုန်ဈေးနှုန်းတွေက ကျဆင်းလာတာမျိုး မရှိဘဲ ဆက်လက်မြင့်တက်နေတယ်လို့ ရန်ကုန်မြို့နေ ပြည်သူအချို့က ပြောပါတယ်။ ဆန်ဈေးနဲ့ စားသုံးဆီဈေး တွေက တည်ငြိမ်နေပေမယ့် ကော်ဖီမစ်၊ ဟင်းသီးဟင်းရွက်အပါအဝင် စားသောက်ကုန် အချို့ကတော့ ဈေးနှုန်း တွေ ကျဆင်းလာတာမျိုး မရှိဘူးလို့လည်း  သာကေတမြို့နယ်မှာ နေထိုင်သူပြည်သူ အချို့က ပြောပါတယ်။

တချို့ရောင်းချသူတွေက အကြောင်းအမျိုးမျိုးကြောင့် ဈေးနှုန်းတက်ခဲ့ရတဲ့ပစ္စည်းတွေကို ပြန်ကျသင့်တဲ့အချိန်မှာ ပြန်ချမရောင်းပေးဘဲ အတက်ဈေးနဲ့ပဲ မှိန်းပြီးရောင်းချနေတာတွေရှိသလို တချို့ကလည်း ကုန်ဈေးနှုန်းအကြောင်း ပြပြီး ဈေးတင်ချင်သလို တင်ရောင်းနေကြတာတွေ ရှိတယ်လို့ မြောက်ဥက္ကလာပမြို့နယ်မှာနေထိုင်တဲ့ ပြည်သူ အချို့က ပြောပါတယ်။ ကုန်ပစ္စည်းဈေးနှုန်းတွေကလည်း နေရာဒေသပေါ်မူတည်ပြီး ဈေးနှုန်းအနည်းငယ် ကွာဟတာတွေ ရှိတယ်လို့လည်း သိရပါတယ်။

လက်ရှိမှာ နိုင်ငံခြားငွေဈေးကွက်ထဲမှာ အမေရိကန်တစ်ဒေါ်လာကို ပြင်ပပေါက်ဈေး ကျပ် ၄၄၀၀ ကနေ ကျပ် ၄၅၅၀ ဝန်းကျင်ရှိပြီး စက်သုံးဆီကတော့ နိုဝင်ဘာ ၂၇ ရက် ရန်ကုန်အထိုင်ဈေးအဖြစ် အောက်တိန်း 92 တစ်လီတာကို၂၉၅၅ ကျပ် ၊ အောက်တိန်း 95 တစ်လီတာကို ၃၁၅၀ ကျပ်၊ ရိုးရိုးဒီဇယ်တစ်လီတာကို ၂၆၂၀ ကျပ်၊ ပရီမီယံဒီဇယ်တစ်လီတာကို ၃၂၅၅ ကျပ် သတ်မှတ်ထားပါတယ်။