ချီလီနိုင်ငံက အက်တာကာမာ ဆားလွင်ပြင်ဟာ လီသီယမ်ဆားရည်ထုတ်ယူမှုကြောင့် တစ်နှစ်ကို ၁ စင်တီမီတာ ကနေ ၂ စင်တီမီတာနှုန်းနဲ့ နစ်မြုပ်နေတယ်လို့ ချီလီတက္ကသိုလ်ရဲ့ လေ့လာမှုတစ်ခုအရ သိရပါတယ်။
၂၀၂၀ နဲ့ ၂၀၂၃ ခုနှစ်အတွင်း စုဆောင်းရရှိထားတဲ့ ဂြိုဟ်တုအချက်အလက်တွေကို အသုံးပြုပြီး ကမ္ဘာမြေမျက်နှာပြင်က ပုံသဏ္ဌာန်တွေကို စစ်ဆေးခဲ့တာ ဖြစ်ပါတယ်။ နစ်မြုပ်လာတဲ့နေရာဟာ လစ်သီယမ်မိုင်းတွင်းလုပ်သားတွေ လုပ်ကိုင်နေတဲ့ ဆားမြေပြန့်ရဲ့ အနောက်တောင်ဘက်မှာ ဖြစ်တယ်လို့ ဆိုပါတယ်။
အဲဒီဧရိယာဟာ ကုမ္ပဏီတွေက ရေစုပ်စက်အများစု ဒါမှမဟုတ် အပြင်းထန်ဆုံး စုပ်ထုတ်နေတဲ့ နေရာအစိတ်အပိုင်းတွေ ဖြစ်ပါတယ်။ လစ်သီယမ် ကြွယ်ဝတဲ့ ဆားရည်ကို စုပ်ထုတ်နှုန်းက ရေအောက်လွှာ အားပြန်ပြည့်တာထက် ပိုမိုမြန်ဆန်နေလို့ မြေပြိုကျတာ ဒါမှမဟုတ် ကမ္ဘာ့မျက်နှာပြင် ဒေါင်လိုက်ရွေ့လျားတာ ဖြစ်စေနိုင်ပါတယ်။
ကမ္ဘာ့ဒုတိယအများဆုံး လီသီယမ် ထုတ်လုပ်တဲ့ ချီလီနိုင်ငံမှာ ကမ္ဘာ့အကြီးဆုံး လီသီယမ်အရန်သိုက် တစ်ခုဖြစ်တဲ့ အက်တာကာမာ ဆားလွင်ပြင် ကနေ ပေါ့ပါးတဲ့သတ္တုကို ထုတ်ယူပါတယ်။
သတ္တုတူးဖော်တာက ရှားပါးတဲ့ ရေချိုနဲ့ လစ်သီယမ်ကြွယ်ဝတဲ့ ဆားရည်ကို လျော့နည်းစေပြီး လူနဲ့ တောရိုင်းတိရစ္ဆာန်တွေအတွက် ဒေသခံအသိုင်းအဝိုင်းက စိုးရိမ်နေကြပါတယ်။
