မြန်မာနိုင်ငံရှိ ခရီးသွားဒေသတွေကို ပြည်ပနိုင်ငံကနေ နိုင်ငံခြားသားခရီးသွားတွေ ပြန်လည်ဝင်ရောက်လာနိုင်ဖို့အတွက် ကျင်းပမဲ့ UMTA Travel Fair 2026 မှာ ပြည်တွင်းပြည်ပက ပြခန်းပေါင်း ၁၀၀ ဝန်းကျင် ပါဝင်ပြသသွားမယ်လို့ မြန်မာနိုင်ငံခရီးသွားလုပ်ငန်းရှင်များအသင်း (UMTA) ကနေ သိရပါတယ်။
UMTA Travel Fair 2026 ကို လာမဲ့ ဇွန်လ ၁၃ ရက် နဲ့ ၁၄ ရက်မှာ ရန်ကုန်မြို့ရှိ ဆီဒိုးနားဟိုတယ်မှာ ကျင်းပမှာ ဖြစ်ပါတယ်။မြန်မာ့ခရီးသွားကဏ္ဍဟာ ကိုဗစ် -၁၉ ကာလနောက်ပိုင်းကစပြီး ခုချိန်ထိနှေးကွေးနေခဲ့တာဖြစ်ပြီး အခုနှစ်ပွင့်လင်းရာသီမှာ နိုင်ငံတကာက ခရီးသွားဧည့်သည်တွေ မြန်မာနိုင်ငံကို ပြန်လည်ဝင်ရောက်လာဖို့၊ ပြည်တွင်းနဲ့နိုင်ငံတကာခရီးသွား လုပ်ငန်းအသိုင်းအဝိုင်းက ခရီးသွားလုပ်ငန်းရှင်တွေကို မြန်မာနိုင်ငံရဲ့ လှပတဲ့ခရီးစဉ်ဒေသတွေကို ဆွဲဆောင်နိုင်ဖို့ဆိုတဲ့ ရည်ရွယ်ချက်တွေနဲ့ ဒီပြပွဲကို ကျင်းပတာဖြစ်တယ်လို့ UMTA ရဲ့ ဥက္ကဋ္ဌ ဦးကျော်ဘုန်းနိုင် ကပြောပါတယ်။
ပြပွဲမှာ မလေးရှား ၊ နီပေါ ၊ ရုရှား ၊ ပြင်သစ် ၊ စပိန် ၊ စလိုဗက်ကီးယား ၊ ရိုမေးနီးယား ၊ အိန္ဒိယ ၊ အင်ဒိုနီးရှားနိုင်ငံ တွေက ခရီးသွားလုပ်ငန်းရှင်တွေ အပါအဝင် ပြည်တွင်းပြည်ပက ခရီးသွားကုမ္ပဏီ ၅၀ ခန့်နဲ့ နိုင်ငံတကာခရီး သွားအဖွဲ့အစည်းတွေ ပါဝင်ပြသမယ်လို့ ဆိုပါတယ်။အဲဒီပြပွဲမှာ ဟိုတယ်တွေ ၊ ပြည်တွင်းပြည်ပလေကြောင်းလိုင်းတွေ ၊ ခရီးသွားလုပ်ငန်းတွေ ၊ ဆေးရုံတွေ ၊ စားသောက်ကုန်လုပ်ငန်းတွေ ၊ မြန်မာ့လက်မှုအနုပညာအမှတ်တရပစ္စည်းအရောင်းဆိုင်တွေ ၊ ခရီးသွားလုပ်ငန်းနဲ့ ဆက်စပ်နေတဲ့ Hospitality ကျောင်းတွေ ပါဝင်ပြသကြမယ်လို့ သိရပါတယ်။UMTA Travel Fair 2026 ကို ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာနရဲ့ လမ်းညွှန်မှု၊ မြန်မာနိုင်ငံခရီးသွားအဖွဲ့ချုပ်နဲ့ညီနောင်အသင်းတွေရဲ့ ပံ့ပိုးမှုနဲ့ မြန်မာနိုင်ငံခရီးသွားလုပ်ငန်းရှင်များအသင်းက ဦးဆောင်ကျင်းပမှာ ဖြစ်ပါတယ်။ပြပွဲကို ဘယ်သူမဆိုအခမဲ့လာရောက်ကြည့်ရှုနိုင်မှာဖြစ်ပြီး ပြပွဲမှာ ပြည်တွင်း၊ ပြည်ပလေယာဉ်လက်မှတ်တွေနဲ့ တခြားလက်ဆောင်ပစ္စည်းတွေပေးအပ်မဲ့ Gift and Quiz Show အစီအစဉ်တွေထည့်သွင်းပေးထားတယ်လို့ သိရပါတယ်။
