ဘာစီလိုနာအသင်းရဲ့ ဂျာမနီကွင်းလယ်လူ ဂန်ဒိုဂန်က လက်ရွေးစင်ကစားသမားအဖြစ်ကနေ အနားယူလိုက်ပြီလို့ ဩဂုတ်လ(၁၉)ရက်နေ့က တရားဝင်ကြေညာသွားခဲ့ပါတယ်။
အသက်(၃၃)နှစ်အရွယ် ကွင်းလယ်ကစားသမား ဂန်ဒိုဂန်ဟာ ပြီးခဲ့တဲ့ယူရို(၂၀၂၄)ပြိုင်ပွဲမှာ ဂျာမနီအသင်းအတွက် ကစားပေးခဲ့ပေမယ့် အခုအချိန်မှာတော့ အနားယူဖို့ ဆုံးဖြတ်ခဲ့တာပါ။
အချိန်အတော်ကြာ စဉ်းစားပြီးနောက်မှာတော့ ဂျာမနီလက်ရွေးစင် ကစားသမားအဖြစ်က အနားယူဖို့ ဆုံးဖြတ်လိုက်ပြီလို့ ဂန်ဒိုဂန်က သူ့ရဲ့ကိုယ်ပိုင်ဆိုရှယ်မီဒီယာ အကောင့်ကတစ်ဆင့် ပရိသတ်တွေကို တရားဝင် အသိပေးသွားခဲ့ပါတယ်။
ဂန်ဒိုဂန်ဟာ ဂျာမနီလက်ရွေးစင်အသင်းမှာ (၂၀၁၁)ခုနှစ်ကစတင်ကာ ပွဲထွက် ကစားခွင့်ရခဲ့တာဖြစ်ပြီး အသင်းအတွက်ပြိုင်ပွဲစုံ(၈၂)ပွဲမှာ (၁၉)ဂိုး သွင်းယူပေးခဲ့တာဖြစ်ပါတယ်။
