အမေရိကန်နိုင်ငံမှာ ရာသီကြိုခြေစမ်းပွဲကစားနေတဲ့ ချယ်လ်ဆီးအသင်းဟာ အသင်းရဲ့နွေရာသီ နောက်ဆုံးခြေစမ်း ပွဲဖြစ်တဲ့ ရီးရဲလ်အသင်းနဲ့ပွဲစဉ်မှာလည်း (၂)ဂိုး၊ (၁)ဂိုးနဲ့ရှုံးနိမ့်ခဲ့ပါတယ်။
ရီးရဲလ်အသင်းဟာ ချယ်လ်ဆီးအသင်းကို ပွဲအစမှာတင် ဖိအားပေးကစားနိုင်ခဲ့သလို လိုအပ်နေတဲ့ဂိုးတွေကို သွင်းယူခဲ့တာကြောင့် ပွဲအပြီးမှာအနိုင်ရခဲ့တာပါ။
ချယ်လ်ဆီးအသင်းဟာ အခုပွဲစဉ်မှာ အသင်းရဲ့အဓိက ကစားသမားအများစုကို အသုံးပြုခဲ့ပေမယ့်လည်း အသင်းရဲ့ ခံစစ်ကအမှားတွေကို ဆက်လက်ပြုလုပ်နေခဲ့တာကို တွေ့ခဲ့ရပါတယ်။
ရီးရဲလ်အသင်းအတွက် ဂိုးတွေကို ပွဲချိန် (၁၉)မိနစ်မှာ ဗက်ကွက်ဇ်၊ (၂၇)မိနစ်မှာ ဒီယက်ဇ်တို့က သွင်းယူပေးခဲ့တာပါ။
ချယ်လ်ဆီးအသင်းအတွက် တစ်လုံး တည်းသောချေပဂိုးကို ပွဲချိန်(၃၉)မိနစ်မှာ အန်ဇိုဖာနန်ဒက်ဇ်ရဲ့ပေးပို့မှုကို မာဒူကီက ခေါင်းတိုက်သွင်းယူပေးခဲ့ပါတယ်။
ချယ်လ်ဆီးအသင်းဟာ အခုပွဲစဉ်မှာ ရှုံးနိမ့်ခဲ့တာကြောင့် ရာသီကြိုခြေစမ်းပွဲ (၅)ပွဲကစားပြီးခဲ့ချိန်မှာ (၁)ပွဲနိုင်၊ (၁)ပွဲသရေရလဒ်သာရခဲ့ပြီး (၃)ပွဲအထိ ရှုံးနိမ့်ခဲ့တာဖြစ်ပါတယ်။
