2025 PUBG MOBILE WORLD CUP (PMWC 2025) ချန်ပီယံဆုရှင်ဖြစ်တဲ့ မြန်မာကိုယ်စားပြု E Sports အသင်း Yangon Galacticos (ဂါလာတ်တီကိုစ်)အသင်းကို ဂုဏ်ပြုချီးမြှင့်ငွေ ကျပ်သိန်း ၁၃၀၀၀ ကျော် ပေးအပ်ခဲ့တယ်လို့ အားကစားနှင့် လူငယ်ရေးရာဝန်ကြီးဌာနက သိရပါတယ်။
ဂုဏ်ပြုချီးမြှင့်ငွေ ပေးအပ်ပွဲကိုတော့ ဩဂုတ် ၂၈ ရက် မနက်ပိုင်းက ရန်ကုန်မြို့၊ ကျိုက္ကဆံအားကစားကွင်းရှိ အားကစားနှင့်ကာယပညာသိပ္ပံ(ရန်ကုန်)၊ ပြည်ထောင်စုခန်းမမှာ ကျင်းပခဲ့တာပါ။ဂုဏ်ပြုပွဲ အခမ်းအနားကို မြန်မာနိုင်ငံ အိုလံပစ်ကော်မတီဥက္ကဋ္ဌ၊ အားကစားနှင့်လူငယ်ရေးရာဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး Jeng Phang နော်တောင်က ဂုဏ်ပြု အဖွင့် အမှာစကား ပြောကြားပြီး မြန်မာနိုင်ငံ အီလက်ထရောနစ် အားကစားအဖွဲ့ချုပ်ဥက္ကဋ္ဌက ပြိုင်ပွဲနဲ့ ပတ်သက်တဲ့ အတွေ့အကြုံတွေကို ရှင်းလင်းပြောကြားခဲ့တယ်လို့ သိရပါတယ်။
အဲဒီနောက် အလှူရှင်တွေရဲ့ ဂုဏ်ပြုချီးမြှင့်ငွေ စုစုပေါင်း ကျပ်သိန်း(၁၃၁၀၀)ကို ပြည်ထောင်စုဝန်ကြီး Jeng Phang နော်တောင်က ကမ္ဘာ့ချန်ပီယံဆု ရရှိခဲ့တဲ့ မြန်မာအားကစားအဖွဲ့ကို ပေးအပ်ချီးမြှင့်ခဲ့ပါတယ်။ဆော်ဒီအာရေဗျနိုင်ငံ၊ ရီယက်(ဒ်)မြို့မှာ ပြီးခဲ့တဲ့ ဩဂုတ် ၁ ရက်ကနေ ၃ ရက်အထိ ကျင်းပတဲ့ PMWC 2025 ဗိုလ်လုပွဲစဉ်တွေမှာ Yangon Galacticos အသင်းက အကောင်းဆုံး လက်စွမ်းပြပြီး အမှတ်အများဆုံး ရယူနိုင်ခဲ့ တာကြောင့် ကမ္ဘာ့အဆင့် ၁ ချန်ပီယံဆုကို ထိုက်ထိုက်တန်တန် ဆွတ်ခူး ရရှိခဲ့တာပါ။အခုရရှိတဲ့ ချန်ပီယံဆုဟာ Yangon Galacticos PUBGM အသင်းအနေနဲ့ ပထမဆုံး E Sports ကမ္ဘာ့ဖလားဖြစ်တဲ့ World Champion Title ကို ရယူနိုင်တဲ့ မြန်မာနိုင်ငံရဲ့ ပထမဦးဆုံး အသင်းအဖြစ် မှတ်တိုင်သစ် ရေးထိုးနိုင်ခဲ့တာ ဖြစ်ပါတယ်၊၊
