ပြည်ထောင်စုအစိုးရအဖွဲ့ဝင်တွေ၊ဒုတိယဝန်ကြီးတွေနဲ့ ပြည်ထောင်စုအဆင့်အဖွဲ့အစည်းဝင်တွေအနေနဲ့ ရွေးကောက်ပွဲအတွက် ပါတီစည်းရုံးမှုနဲ့ နယ်မြေစည်းရုံးမှုတွေကို ဩဂုတ် ၁၈ ရက်ကစပြီး ဆောင်ရွက်နိုင်ပြီ ဖြစ်တယ်လို့ ပြည်ထောင်စုရွေးကောက်ပွဲကော်မရှင်က ဩဂုတ် ၂၁ ရက် ရက်စွဲနဲ့ ထုတ်ပြန်ကြေညာပါတယ်။
ပြည်ထောင်စုအစိုးရအဖွဲ့ဝင်တစ်ဦးဦး၊ ဒုတိယဝန်ကြီးတစ်ဦးဦးဟာ အပိုင်းလိုက်ကျင်းပမဲ့ ပါတီစုံဒီမိုကရေစီ အထွေထွေရွေးကောက်ပွဲတစ်ရပ်ရပ်မှာ ပါဝင်အရွေးချယ်ခံမဲ့သူဖြစ်ရင် နိုင်ငံသားတစ်ဦးကို ဖွဲ့စည်းပုံအခြေခံ ဥပဒေပုဒ်မ ၃၈ ပုဒ်မခွဲ(က)အရ ပေးအပ်ထားတဲ့ ရွေးကောက်တင်မြှောက်ခံပိုင်ခွင့် မဆုံးရှုံးစေဖို့အလို့ငှာ ရွေးကောက်ပွဲကျင်းပဖို့ ပြည်ထောင်စုရွေးကောက်ပွဲကော်မရှင်က ကြေညာတဲ့ ၂၀၂၅ ခုနှစ်၊ ဩဂုတ်လ ၁၈ ရက် ကစပြီး ဖွဲ့စည်းပုံအခြေခံဥပဒေပုဒ်မ ၁၂၀ နဲ့ ၁၂၁ တို့မှာပါတဲ့ ပြဋ္ဌာန်းချက်တွေနဲ့ကိုက်ညီရင် ပါတီစည်းရုံးရေး လုပ်ငန်းတွေ၊ နယ်မြေစည်းရုံးရေးလုပ်ငန်းတွေကို ဆောင်ရွက်ခွင့်ရှိတယ်လို့ ဖော်ပြထားပါတယ်။
ထို့အတူ ပြည်ထောင်စုတရားသူကြီးချုပ် သို့မဟုတ် ပြည်ထောင်စုတရားလွှတ်တော်ချုပ်တရားသူကြီး၊ နိုင်ငံတော် ဖွဲ့စည်းပုံဆိုင်ရာအခြေခံဥပဒေခုံရုံးဥက္ကဋ္ဌ သို့မဟုတ် အဖွဲ့ဝင်၊ ပြည်ထောင်စုရှေ့နေချုပ် သို့မဟုတ် ဒုတိယ ရှေ့နေ ချုပ်၊ ပြည်ထောင်စုစာရင်းစစ်ချုပ် သို့မဟုတ် ဒုတိယစာရင်းစစ်ချုပ်၊ ပြည်ထောင်စုရာထူးဝန်အဖွဲ့ဥက္ကဋ္ဌ သို့မဟုတ် အဖွဲ့ဝင်တွေအနေနဲ့လည်း သက်ဆိုင်ရာတည်ဆဲဥပဒေတွေအရ အပိုင်းလိုက်ကျင်းပမဲ့ ပါတီစုံဒီမိုကရေစီ အထွေ ထွေ ရွေးကောက်ပွဲတစ်ရပ်ရပ်မှာ ပါဝင်ရွေးချယ်ခံမဲ့သူဖြစ်ရင် နိုင်ငံသားတစ်ဦးကို ဖွဲ့စည်းပုံအခြေခံဥပဒေ ပုဒ်မ ၃၈ ပုဒ်မခွဲ(က)အရ ပေးအပ်ထားတဲ့ ရွေးကောက်တင်မြှောက်ခံပိုင်ခွင့် မဆုံးရှုံးစေဖို့အလို့ငှာ ရွေးကောက်ပွဲကျင်းပဖို့ ပြည်ထောင်စုရွေးကောက်ပွဲကော်မရှင်က ကြေညာတဲ့ ၂၀၂၅ ခုနှစ်၊ ဩဂုတ်လ ၁၈ ရက်ကစပြီး ဖွဲ့စည်းပုံအခြေခံ ဥပဒေပုဒ်မ ၁၂၀ နဲ့ ၁၂၁ တို့မှာပါတဲ့ ပြဋ္ဌာန်းချက်တွေနဲ့ကိုက်ညီရင် ပါတီစည်းရုံးရေးလုပ်ငန်းတွေ၊ နယ်မြေစည်းရုံး ရေးလုပ်ငန်းတွေကို ဆောင်ရွက်ခွင့်ရှိတယ်လို့ ထုတ်ပြန်ချက်အရ သိရပါတယ်။ရွေးကောက်ပွဲဆိုင်ရာ စုဝေးဟောပြောတာနဲ့ မဲဆွယ်စည်းရုံးခွင့်တွေကိုတော့ လွှတ်တော်ကိုယ်စားလှယ်လောင်း တွေ အတည်ပြုပြီးတဲ့နောက်ပိုင်းမှာ ပြည်ထောင်စုရွေးကောက်ပွဲကော်မရှင်က ထုတ်ပြန်ပေးသွားမယ်လို့ ဖော်ပြထားပါတယ်၊၊
