ဖော်မြူလာဝမ်းအသင်းဖြစ်တဲ့ ရက်ဘူးလ်အသင်းဟာ အသင်းတည်ထောင်မှု နှစ် ၂၀ ပြည့်အထိမ်းအမှတ်အဖြစ် အင်္ဂလန်နိုင်ငံ ချီချက်စတာမြို့မှာ ပြုလုပ်တဲ့ Goodwood ပွဲတော်မှာ ပြိုင်ကားမောင်းနှင်ပြခဲ့ပါတယ်။
ပွဲတော်ကို ရောက်လာတဲ့ ပရိသတ်တွေရှေ့မှာ ကမ္ဘာ့ချန်ပီယံ ဗာစတက်ပန်အပါအဝင် ရက်ဘူးလ်အသင်းရဲ့ လက်ရှိဒရိုင်ဗာ တွေအပြင် အရင်ကမောင်းနှင်ခဲ့ဖူးတဲ့ ဒရိုင်ဗာတွေပါ ပြိုင်ကားမောင်းနှင်ပြသခဲ့တာဖြစ်ပါတယ်။
ရက်ဘူးလ် အသင်းဟာ အသင်းတည်ထောင်တဲ့ နှစ် ၂၀ အတွင်းမှာ ဖော်မြူလာဝမ်း အသင်းလိုက်ချန်ပီယံဆု ၆ ကြိမ်နဲ့ ဒရိုင်ဗာချန်ပီယံဆုကို ၇ ကြိမ် ရရှိခဲ့တာဖြစ်ပါတယ်။
နယ်သာလန်ဒရိုင်ဗာ ဗာစတက်ပန်ကတော့ ဖော်မြူလာဝမ်း ကမ္ဘာ့ချန်ပီယံဆုကို နောက်ဆုံး ၃ နှစ်ဆက်တိုက် ရယူပေးထားပြီး ရက်ဘူးလ်အသင်းသမိုင်းမှာ အအောင်မြင်ဆုံး ဒရိုင်ဗာအဖြစ် စံချိန်တင်ထားပါတယ်။ ဗာစတက်ပန်ဟာ အခုရာသီ ဖော်မြူလာဝမ်းပြိုင်ပွဲရဲ့ ဂရင်းပရီပွဲစဉ် ၁၂ ခု အပြီးမှာ ၇ ခု အနိုင်ရထားပြီး ကမ္ဘာ့ချန်ပီယံဆု အမှတ်ပေးဇယားကို ဦးဆောင်နေတာဖြစ်ပါ တယ်။
