အောက်တိုဘာလ(၂၀)ရက်နေ့က အင်္ဂလန်နိုင်ငံမှာပြုလုပ်တဲ့ အားကစားကလောင်ရှင်များ အစည်းအရုံးရဲ့ ညစာ စားပွဲအခမ်းအနားမှာ မန်ယူအသင်းရဲ့နည်းပြ တန်ဟတ်က အားကစားကလောင်ရှင်တွေက ပေးအပ်ချီးမြှင့်တဲ့ အကောင်းဆုံးဆုကို ရရှိခဲ့ပါတယ်။
တန်ဟတ်ဟာ ပြီးခဲ့တဲ့ဘောလုံးရာသီက မန်ယူအသင်းကို အက်ဖ်အေဖလားရရှိအောင် စွမ်းဆောင်ပေးနိုင်ခဲ့တာကြောင့် အားကစားကလောင်ရှင်တွေက ပေးအပ်တဲ့ဆုကို ချီးမြှင့်ခံခဲ့ရတာပါ။
မန်ယူအသင်းဟာ ပြီးခဲ့တဲ့ဘောလုံးရာသီက အက်ဖ်အေဖလား ဗိုလ်လုပွဲစဉ်မှာ မန်စီးတီးအသင်းနဲ့ တွေ့ဆုံခဲ့တာဖြစ်ပေမယ့်လည်း (၂)ဂိုး၊ (၁)ဂိုးနဲ့ အနိုင်ရရှိအောင် စွမ်းဆောင်နိုင်ခဲ့တာကြောင့် အက်ဖ်အေဖလား ချန်ပီယံဆုကို သိမ်းပိုက်နိုင်ခဲ့တာ ဖြစ်ပါတယ်။
ပြီးခဲ့တဲ့ဘောလုံးရာသီက ပရီးမီးယားလိဂ်ပြိုင်ပွဲမှာ အဆင့်(၈) နေရာမှာသာ ရပ်တည်နိုင်ခဲ့ပေမယ့် အက်ဖ်အေဖလားကို ရယူနိုင်ခဲ့တာကြောင့် မန်ယူအသင်းဟာ အခုနှစ်မှာ ယူရိုပါလိဂ်ပြိုင်ပွဲဝင်ခွင့်ကို ရရှိခဲ့ပါတယ်။
အခုလိုမျိုး အကောင်းဆုံးဆုကို ရွေးချယ်ပေးခဲ့တဲ့အတွက် အားကစား ကလောင်ရှင်များ အစည်းအရုံးကို ကျေးဇူးတင်မိသလို ဖလားတွေရယူနိုင်ဖို့အတွက်လည်း ကြိုးစားသွားမယ်လို့ မန်ယူနည်းပြ တန်ဟတ်က ဆုချီးမြှင့်ပွဲမှာ ပြောကြားသွားခဲ့ပါတယ်။
